True Church by Atty. Marcelo Bacalso

True Church – Atty. Marcelo Bacalso

Hawani Ang Kasingkasing

Karong Hunyo 24 saulogon ang pista alang kang San Juan Magbubunyag. Unsaon man nato pagsaulog sa pista alang kang San Juan? Unsa may atong buhaton aron mahimuot si San Juan nga maglantaw kanato gikan sa bintana sa langit?  Malipay kaha si San Juan nga mangabisi ta sa pag-andam sa pagkaon ug ang mamistahay mabisi sab  pagkaon ug pag-inom hinungdan dili na makasimba? Sa dinhi pa si San Juan sa kalibotan nagsigi ra ba to’g puasa. Dugos ug dulon ra  ang iyang gikaon.

Malipay kaha si San Juan nga bibohon nato ang pista sa mga kalihokang walay labot ang atong pagtoo? Ermitanyo ra ba to si San Juan. Taas ang panahon sa iyang pagpuyo ug pamalandong sa awaaw nga dapit sa Judea.

Malipay kaha si San Juan kon magpakasala ta sa bisperas ug kapistahan? Kadto ra ba si San Juan mamadlong  sa mga imoral nga buhat. Mao tong gidakop, gibilanggo ug giputlan sa liog tungod sa iyang pagpunay og saway sa pagpangabit ni Haring Herodes sa asawa sa iyang igsoon. Dili ra ba niya ihunghong, isinggit gyod niya ang pagbadlong.

Malipay kaha si San Juan kon mangaligo lang ta sa dagat kay taob ug manablig ta’g tubig sa kada tawo nga molabay sa atong tugkaran?  Pagkalooy ba sab nato kon mao ra kini ang atong nasabtan sa kinabuhi ni San Juan. Tinuod nga namunyag si San Juan sa tubig apan siyay gaingon nga dunay labaw pa kaniya, si Jesucristo nga magbunyag sa Espiritu Santo.  Busa  gisinggit ni San Juan sa kamingawan,”Andama ninyo ang dalan alang sa Ginoo, himoang tul-id ang iyang agianan!”

Kon ingon niini ang iyang awhag sa mga Hudiyo sa panahon nga nagpakatawo ang Balaang Kalooy, labi pang tukma ang maong awhag alang kanato karon sa dili pa mobalik si Kristong Hari nga mohukom sa mga buhi ug patay. Karon na ang panahon sa  pag-andam ug pagtul-id sa dalan alang sa Ginoo. Hawanan nato ang atong kasingkasing pinaagi sa pagkompisal ug paghinulsol sa atong mga sala.” Mga bitin! Kinsay nagsulti kaninyo nga makalikay kamo sa taliabot nga paghukom sa Dios? Ipakita ninyo nga naghinulsol na kamo sa inyong mga sala pinaagi sa inyong buhat.” ( Mateo 3:7-8 )

Kasabotan

Sa eninglis nga sinultihan daghan og kahulogan ang pulong kasabotan. Apan anhi ta niining duha ka pulong, covenant ug contract. Basta kontrata gani ang hisgotan nagpasabot nga dunay bayloay sa butang ug serbisyo. Sa unang panahon ang saging bayloan og isda. Karon ang pan o serbisyo bayloan og kuwarta.  Dunay say written contract  diin ang  matag-usa mosaad sa pagtuman sa kasabotan pinaagi sa pagpirma sa ilang ngalan.

Ang laing  kasabotan gitawag og covenant. Labaw pa kini sa bayloay sa butang ug serbisyo tungod kay bayloay man kini mismo sa mga tawo nga nalambigit sa kasabotan.  Usa sa haom nga ehemplo niini mao ang kaminyoon diin ang babaye mitugyan sa iyang kaugalingon ngadto sa lalaki ug ang lalaki mitugyan sa iyang kaugalingon ngadto sa babaye. Unya ang ilang kasabotan gisilyohan sa panumpa atubangan sa Diyos.

Apan niay labing nindot nga covenant nga angay natong ikalipay. Kini mao ang kasabotan sa tawo ug sa Dios. Ang Dios mao gyoy unang nanangpit sa tawo aron maghimo’g kasabotan.Miingon ang Dios sa Israel “Kamo maoy akong katawhan ug Ako mao ang inyong Dios.” Ubos niining kasabotan ang  Israel nanumpa sa Dios  nga magpuyo subay sa Iyang balaod  isip Iyang katawhan ug Siya misaad nga maoy ilang Dios. Dunay mga panalangin sa pagtuman sa kasabotan , duna say tunglo sa pagsupak niini.

Unya ang nakanindot pa gayod niini nga kasabotan kay nakamugna og usa ka pamilya. “Ako mahimong inyong amahan, ug kamo mahimong akong mga anak, nag-ingon ang Ginoo nga Labing Gamhanan.” (2 Cor 6:18). Sa sinugdanan duha pa lamang ang gisagop sa Dios isip iyang mga anak. Sila si Adan ug Eba. Ug dayon iyang gipalapdan pinaagi sa kasabotan uban kang Noe, Abraham, Moses ug David hangtod  ang tanang kanasoran ubos sa kasabotan pinaagi ni Hesukristo. “Kay ang Espiritu nga gihatag sa Dios kaninyo dili mag-ulipon kaninyo aron kamo mahadlok. Ang maong Espiritu maghimo hinuon kaninyo  nga mga anak sa Dios pinaagi sa pag-ingon, “Amahan! Amahan ko!” Makighiusa ang maong Espiritu sa atong espiritu aron pagmatuod nga kita mga anak sa Dios. Ug kay mga anak man kita Niya, madawat nato ang mga panalangin nga gitagana sa Dios ug madawat nato kini uban  kang Cristo. Kay kon makig-ambit kita sa iyang mga pag-antos, makaambit usab kita sa iyang himaya.”(Roma 8: 15-17)

Pamalandong
Walay makatupong sa gugma sa Dios. Gusto gayod Niya nga makaadto ang tawo sa Langit busa gipadala Niya ang Iyang anak sa kalibotan. Binuhat ra man unta Niya ang tawo apan Iyang giisip nga tinuod nga anak.
Dinhi sa akong gipuy-an daghan sa akong mga silingan ang gabuhi og iro. Hayahay kaayo ang mga iro. Gibuhatan og maayong puy-anan, ginapakaon, tinambalan, ginaatiman ang kahindik, usahay ginasininaan, ug uban pang  mga paagi sa pag-amoma nga ikahatag kanila. Tungod niini ang mga iro mopakita’g maayong lihok ngadto sa ilang agalon. Mopakitiw sa ikog ug makig-unot . Labaw sa tanan mopaghot batok sa hulga sa kinabuhi ug kabtangan sa ilang agalon.
Apan kini nga relasyon sa iro ug agalon wala ra sa kumingking kon itandi sa relasyon sa tawo ug Dios. Ang iro dili makapanunod sa bahandi sa iyang agalon samtang ang tawo makapanunod sa bahandi sa Langit. Ang nakanindot lang sa iro  kay natural kaayo niya ang pagpahimuot sa iyang agalon. Kon kini mahimo sa iro walay rason nganong dili kini mahimo sa tawo ngadto sa Dios nga iyang Amahan.
 

Tampo Sa Pagsaulog Sa Tuig Ni San Pablo Apostol

Gahapon sa akong pagluhod aron magrosaryo nakit-an nako ang librito sa novena ni San Pablo Apostol ubos sa altar. Nahinumdom ko nga  gideklara diay ni Papa Benedicto XVI ang 2008 isip tuig ni San Pablo Apostol. Kini sugdan sa  pagsaulog  karong Hunyo 26  tapos sa adlaw sa mga amahan.

Busa isip paambit akong gisulat sa ubos ang gozo sa novena nga hinikay ni Rev. Pedro del Mar sa parokya ni San Pablo sa  lungsod sa Inabanga, Bohol. Ang pulong gozo gikan sa sinultihang espanyol  nga nagkahulogan og kalipay. Ang pulong Inabangnon puwedeng pulihan sa ngalan sa lumulopyo sa inyong lugar sama sa Osamisnon, Tangubanon, Clarinhon, etc.

Sigi sugdan ta’g awit ang gozo:

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Sa Dios ikaw gipili,
Patron namong palaran,
Kay ikaw ang alampoan,
Sa mga tawong binunyagan,
Sa among mga kalisdanan,
Kami nimo panabangan.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Nagsakay ka sa kabayo,
Saulo ang imong bansagon,
Ang tuyo nimo kristiyanos,
Nga buot mo pagadakpon,
Apan ikaw ginabalda,
Ni Cristo nga Ginoo ta.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Saulo, Saulo mao ang tingog,
Nga gayod imong nadungog;
Ang tuyo mo dili mahimo,
Sa pagpuo sa ngalang kristiyanos,
Ay saulian ka hinuon
Sa kadaot nga imong gihimo.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Padayon ikaw sa Damasco,
Bunyagan, tudloan ka didto,
Dayon ipaila mo ako Pablo,
Sa daghanan nga mga tawo,
Kay ikaw ang akong gipili,
Sa pagmantala nga hinanali.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Daw linti ka nga gamhanan,
Nga nagatudlo sa katawhan,
Sa pagtaho ug pagsangyaw,
Sa kang Cristong pagkabanhaw,
Aron kami managpanuo,
Sa matuod nga Dios ug Ginoo.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Ang tanan nga masakiton,
Sa panabang mo natambalan,
Ug ikaw ang ginakurogan,
Sa mga mangil-ad ug daotan,
Kay ikaw ang tinugyanan,
Ni Cristo dakong gamhanan.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Ikaws man si San Pablo,
Usa ka haliging bato,
Sa Santa Iglesia sandiganan,
Ug sa mga kristiyanos linaoman,
Aron sa pag-agak sa ngatanan,
Ngadto sa dayon nga kapalaran.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Gipapatay kamo ni Neron,
Emperador nga malupigon,
Kay inyo man nga ginalaglag,
Ang mga pagdumot ug kasilag,
Ang mga diosdios ginatumpag,
Ug gipasidlak ninyo ang kahayag.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Kaming ubos mong mga sakop,
Tabangi gayod Senor San Pablo,
Bantayan mo ang among tanaman,
Mga daro, hayop ug kabtangan,
Mga mais, lubi ug kahumayan,
Nga lawas namo kabuhian.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo

Ibulag mo sa among banwa,
Ang mga daotan nga pagdiwata,
Ang mga mangil-ad nga paglihi,
Kanamo gayod igawakli:
Ug sa kamatayon namo bantayan,
Ug ihatod mo kami sa kabuhayan.

Haligi nga malig-on
Salili ni Jesucristo,
Dalangpan sa Inabangnon,
Apostol Senor San Pablo